Younhi Sar-e-Raah Chaltay Chaltay…

Aaj subah eik dost ne Kaha...

"Ramzan ki woh Ronaq dikhai nahin deti yaar"

-- Jawab mein, mere moun se sirf itna nikla ke...

"Jiss mulk mein be gunahon ka be-daraigh khoon bahaya jaa raha ho,
jahan martay huay logon ko rozana ke hisaab se barhti hui mehngai, be rozgaari aur jaan ke khof se mazeed maara jaa raha ho,
jahan insani khoon paani se bhi ziyada arzaan ho jaaye,
jahan sailab se ghiray majboor aur lutay huay ghareebon, ke jin ke nanhay nanhay bachay pani ki eik boond ko taras rahay hon unhain eik eik Roti 25 - 25 rupay ki farokht ki jaa rahi ho,
jahan Musalman Allah ke mehman ban'nay ki saza mein jhoot aur faraib ke saharay 5 rupay ki cheeze 30 rupay mein baich rahay hon,
Jahan hukumraan apni ayyashi mein apnay faraiz bhool kar logon ki laashon par kharay hon...
Jahan jhoot, makkari, faraib, ghair insani aur ghair akhlaaqi tarz-e-amal aam ho,
Naam nehaad Islam ke thaikay daar Islam ke naam par tukron mein bat kar eik doosray ka khoon bahana jaayez qarar de raha hon,
Deen sirf zaati naam o namood aur mafaadaat ke husool ka zarya reh gaya ho,
Nanhay nanhay bachon ke saath Insaniat se giri hui zayadtian ki jaa rahi hon,
Aurat ki izzat eik mamooli khilonay se ziyada ahmiat ki haamil na reh gayee ho,
Insaniat Sharminda ho jiss mulk ke insaanon ko insan kehtay huay…

WAHAN RAMZAN KI RONAQ AUR REHMAT TAU KYA...
USS KA SAAYA AUR AHSAAS TAKK NAHI PHOHONCH SAKTA"...

Aey Quaid-e-Azam

Kyun di hamain azaadi ke hain itnay pareshan
Behtar tha woh angraiz ka danda, woh qalamdan

AYE QUAID-E-AZAM HAIYEH KAISATERA AHSAAN...

-------------------------------------------

Hakim hain jo iss waqt ke shaitan ban gaye
Insanon ke leader tau ab haiwan ban gaye
Mehkoom inn ki ronaq-e-dandaan ban gaye

kaise mein kahoon kaise hai jeeta yahan insan
AEY QUAID-E-AZAM HAI YEH KAISA TERA AHSAAN

--------------------------------------------

Mehngai ke iss bojh se insan mar gaye
Ramzan jo aaya tau Musalman mar gaye
Naslon ke ameen thay jo woh be-naam mar gaye

Ab kiss tarah baaqi rahay umeed ka damaan
AEY QUAID-E-AZAM HAI YEH KAISA TERA AHSAAN

--------------------------------------------

Hafiz hain yeh Quran ke par qatal karain hain
Maslak pay kabhi qaum pay yeh jang karain hain
Insanon ko dil khol kay ab tang karain hain

Kya yeh hi hai Islam jo tha aap ka armaan
AEY QUAID-E-AZAM HAI YEH KAISA TERA AHSAAN

--------------------------------------------

Majboor hai marghoob ghiza saheb-e-zarr ki
Mehfooz nahin izzatain abb apnay hi ghar ki
Hai mulk kya, logon ki yahan kiss ne fikar ki

Haath aaya jo jiskay wohi loota gaya har aan
AEY QUAID-E-AZAM HAI YEH KAISA TERA AHSAAN

---------------------------------------------

Qabil hi nahin thay kisi azaadi ke hum tau
Rehtay rahain ghairon ke nageen aadi hain hum tau
Na-qabil-e-bardasht si barbaadi hain hum tau

Is mulk ka iss qaum ka Allah hi nigahbaan
AEY QUAID-E-AZAM HAI YEH KAISA TERA AHSAAN